Vətəndaşların müraciət etmək hüquqları ilə bağlı keçirilən monitorinqin nəticələri açıqlanıb 

«Cəmiyyətin və Vətəndaş Münasibətlərinin İnkişafı» İctimai Birliyi Avropa Demokratiyanı Himayə Fondunun (EED) dəstəyi ilə “Ədalətli cəmiyyət naminə (Vətəndaşların dövlət orqanlarına müraciət etmək hüquqlarının təmin edilməsinə dəstək proqramı)”layihəsi çərçivəsində monitorinq və sorğu  həyata keçirib. İB-dən bildirilib ki, monitorinqin  məqsədi  Azərbaycan  hökumətinin  bu  sahədə  həyata  keçirdiyi tədbirlərə, o cümlədən dövlət orqanlarının fəaliyyətinin təkmilləşdirilməsi, şəffaflığın yaradılması  və  korrupsiyaya  qarşı  mübarizə  tədbirlərinə  dəstək  verilməsidir. Həmçinin bu istiqamətdə fəaliyyətin daha səmərəli həyata keçirilməsinə yardım göstərilməsi və əldə olunmuş  nailiyyətlər,  görülən  işlər  barədə  ictimaiyyətin  məlumatlandırılmasıdır. Məqsəd eyni zamanda  Azərbaycan Respublikası qanunvericiliyinə uyğun olaraq vətəndaşların müraciət etmək hüquqlarının  reallaşdırılması,  onlara  baxılma  qaydaları,  bu  istiqamətdə  dövlət orqanlarının fəaliyyətini nəzərdən keçirmək olub.

Monitorinq 2 istiqamət üzrə aparılıb. Belə ki, öncə dövlət  orqanlarının  fəaliyyətində  vətəndaşların  müraciət  etmək  hüquqlarının reallaşdırılması, onlara baxılma qaydaları və s. səviyyəsini öyrənilib. Daha sonra dövlət orqanlarının öz fəaliyyəti  barədə  ictimaiyyəti  məlumatlandırma vəziyyətini monitorinq edilib. 

Bakı və 5 regionda keçirilən monitorinq zamanı 30-a yaxın rəsmi dövlət hakimiyyəti orqanları üçün sorğular göndərilib, eləcə də müxtəlif maraq qrupları, ictimai fəallar və əhali arasında sosioloji sorğular aparılıb. Bundan başqa  rəsmi dövlət hakimiyyəti orqanlarının və müxtəlif maraq qruplarının təmsilçilərindən müsahibələr götürülüb. Eyni zamanda yerli media və internet resurslarının işi analiz edilib.

İki  ay  müddətində  həyata  keçirilən  monitorinqin  nəticələrinə  görə,  demək  olar  ki,  bütün dövlət orqanlarının vebsaytları fəaliyyət göstərir və əksər saytlarda da elektron müraciət üçün xüsusi  bölmələr  fəaliyyət  göstərir.  Lakin  edilən  müraciətlərlə  bağlı  məlumatlar  və müraciətlərlə bağlı görülən tədbirlər barədə məlumatlar saytlarda yeləşdirilməyib. 

 Vətəndaşların  dövlət  orqanlarına  müraciətləri  üçün  internet  resurslarından  istifadə sayəsində dövlət orqanları tərəfindən təmin edilməsi ilə bağlı monitorinqin nəticəsində məlum olub ki, mərkəzi  icra  hakimiyyəti  orqanlarının,  rayon  və  şəhər  icra  hakimiyyəti qurumlarının saytlarında vətəndaşların müraciətlərinin,  təklif  və  rəylərinin  qəbul edilməsi  üçün  elektron  ünvanlar  yerləşdirilib.  Bundan  əlavə  həmin  saytların hamısında “Elektron müraciət” bölməsi yaradılıb. Mərkəzi  icra  hakimiyyəti orqanlarının bir çoxunda interaktiv sual-cavab  üçün xüsusi bölmə yaradılıb.  Eyni zamanda monitorinqə cəlb olunan dövlət orqanlarının əksəriyyətində, xüsusi ilə rayon  və  şəhər  icra  hakimiyyəti qurumlarının çoxunun  saytında müzakirələrin təşkil edilməsi  və  interaktiv  sual-cavab  üçün  xüsusi  bölmə  yaradılmayıb. Yəni, hazırkı saytlarda vətəndaşlara bu orqanlarla  onlayn  əlaqə  imkanı yaradılmayıb, interaktiv əlaqə faktiki olaraq birtərəflidir. 

“Monitorinqin nəticələri bir daha sübut etdi ki, bu sahədə əvvəlki illərə nisbətən ciddi  dəyişiklər  olub. Bu,  istər  vətəndaşların  müraciətlərin  qəbulu  və  onların cavablandırılması prosedurunda, istərsə də elektron resurslardan istifadə imkanlarının genişləndirilməsi baxımından. Lakin eyni zamanda, təəssüflə qeyd etməliyik, bu sahədə kifayət  qədər  problemlər qalmaqdadır.  Yəni  bəzi  mərkəzi  icra  hakimiyyəti orqanları  və  yerli  icra  hakimiyyəti orqanları həyata  keçirilən  bu  yeniliklərlə  ayaqlaşa bilmir, vətəndaşların rəy və təkliflərinin qəbul edilməsində,  idarəetmə prosesinə cəlb olunması, ictimai  qərarların qəbulunda onların rəyinin  nəzərə  alınması istiqamətində  aparılan işlərə  laqeyd qalır, özlərini  həm  ictimaiyyətdən  təcrid  vəziyyətində  saxlayır, həm  də vətəndaşların müraciət  və şikayətlərinə  vaxtında və  obeyktiv baxmırlar”, deyə təşkilatdan bildirilib.

6  regionunda keçirilən sorğuda isə cəmi  927 (1000  ədəd sorğu anketi hazırlanmış və paylanmışdı) respondent iştirak edib.  Sorğuda iştirak edənlərin 63,34% kişi, 31,47%-i qadın idi (İştirakçıların 5,19%-i isə bu haqda heç bir qeyd etməyiblər).

Sorğuya cəlb edilmiş sakinlərin  9,5%-nin  fikrincə,  “hər şey qanun çərçivəsində  olsa  heç  bir problem olmaz”. Maralıdır ki, sorğuda iştirak edənlərin müəyyən hissəsi (19,22-i) bu sahədə olan problemləri dövlət qurumlarının fəaliyyəti ilə deyil, tamam başqa amillərlə əlaqələndirir, yəni bir hissə ( 8,53%-i) bu sahədə olan qüsurlarda daha çox əhalini ittiham edir və hesab edir ki, onların qanunların tələblərinə  əməl  etməmələri  bu  sahədə  problemlərə  səbəb  olur,  digər

hissə  isə  (10,68%)  hesab  edir  ki,  dövlət  orqanlarına  müraciətlərlə  bağlı  hər  hansı  bir problemlər bu sahədə daha çox maarifləndirmə işinin zəif olmasından irəli gəlir.