Lalə Şövkət vahid namizəd olmaq istəyir?
Lalə Şövkət vahid namizəd olmaq istəyir?
Əvəz Temirxan: “Müxalifətin ən reytinqli namizədi Lalə Şövkətdir”Azərbaycan Liberal Partiyasının (ALP) lideri Lalə Şövkət müxalifətin vahid namizədi olmaq istəyir. ALP-nin sədri Əvəz Temirxanın yanvarın 10-da APA-ya verdiyi açıqlamanı oxuduqdan sonra adamın ağlına gələn ilk fikir bundan ibarət olur. Ə.Temirxan açıqlamasında müxalifətin ən reytinqli namizədinin L.Şövkət olduğunu bildirib.
O deyib ki, Azərbaycanda demokratik seçki mühiti yaranarsa, ALP lideri prezident seçkilərində ən real namizəd ola bilər: “Hələ iki il bundan əvvəl müxalifət daxilində vahid namizədi müəyyənləşdirmək haqqında fikir formalaşmışdı. Hətta bəzi partiya liderləri, ictimai təşkilatların nümayəndələri Lalə Şövkətin müxalifətin vahid namizədi olmasını təklif edirdilər. Hesab edirəm ki, müxalifətin ən reytinqli namizədi Lalə Şövkətdir. Əgər ölkədə nisbi demokratik seçki mühiti yaranarsa, qanunvericilik təsbit olunarsa, o zaman partiyanın lideri Lalə Şövkət 2013-cü il prezident seçkilərinə qatıla bilər”. ALP sədrinin sözlərinə görə, seçkilər seçki xatirinə deyil, hakimiyyəti dəyişmə vasitəsi kimi, hakimiyyətə gəlmək naminə olmalıdır: “Seçki xətrinə seçkiyə getməyə dəyməz. Müxalifət ilk növbədə vahid mübarizə komandasına çevrilməlidir, vahid mübarizə platforması olmalıdır”.
Ə.Temirxan dünən “Gündəlik Teleqraf”a açıqlamasında deyib ki, məntiqlə indiki situasiyada Azərbaycan siyasətçiləri, xüsusən prezidentliyə real, iddialı namizədlər əvvəlcə ölkədə azad və ədalətli seçkilərin keçirilməsinə imkan verən qanunvericiliyin lazım olduğunu bilməlidirlər. Onun sözlərinə görə, daha sonra bu seçkilərin keçirilməsinə imkan verən seçkiqabağı şərait olmalıdır: “Bunların heç biri olmadığı halda mən prezidentliyə namizədliyini irəli sürənləri başa düşmürəm. Bu baxımdan Lalə Şövkət hesab edir və əlindən gələni edir ki, prezidentliyə real namizədlər, siyasi partiyalar, köklü islahatlar istəyən bütün ictimai təşkilatlar, QHT-lər, ziyalılar vahid mübarizə komandasında birləşsinlər. Vahid mübarizə proqramı, platforması hazırlansın. Bundan sonra iqtidardan köklü siyasi islahatlar aparmaq tələb olunmalıdır. Daha sonra isə vahid namizəd məsələsi müzakirəyə çıxarılmalıdır. Bütün bunlar olmadan mən prezidentliyə namizədliyini irəli sürənləri başa düşmürəm. Ona görə də mən hesab edirəm ki, Azərbaycan müxalifətinin ən reytinqli namizədi Lalə Şövkətdir. Bununla belə Lalə xanım bu gün nə namizədliyini irəli sürür, nə də vahid namizədliyə iddia edir. O bu şərtlər daxilində namizəd olmaq istəmir”.
Cəmiyyətin və Vətəndaş Münasibətlərinin İnkişafı İctimai Birliyinin sədri, AMİP-in təşkilati məsələlər üzrə keçmiş katibi Əhməd Abbasbəyli isə “Gündəlik Teleqraf”a açıqlamasında Ə.Temirxanın L.Şövkətin namizədliyi ilə bağlı fikir səsləndirməsini kəşfiyyat xarakterli addım saydığını bildirib. O hesab edir ki, L.Şövkət uzun zamandır ictimai-siyasi proseslərdən uzaqlaşıb və onun vahid namizəd kimi qəbul edilməsi mümkün deyil: “Xatırlayırsınızsa, ötən ay AMİP sədri Yusif Bağırzadə də lideri Etibar Məmmədovun müxalifətin vahid namizədi ola biləcəyini söyləmişdi. Görünür, indi də Əvəz Temirxan siyasi partiyaların mövqeyini yoxlamaq istəyib, necə deyərlər kəşfiyyata çıxıb. Müsbət reaksiya olsa, ardınca digər addımlar atılacaq, yox əgər heç bir reaksiya olmasa ikinci dəfə bu məsələyə qayıdılmayacaq”.
Ə.Abbasbəylinin sözlərinə görə, Ə.Temirxanın sədri olduğu partiyanın liderini hamıdan reytinqli sayması təbiidir: “Amma əgər kimsə bu ilin payızında keçiriləcək prezident seçkisində iştirak etmək istəyirsə, mütəmadi olaraq siyasi proseslərin içində olmalıdır. Mən Lalə Şövkəti tam ciddi, təcrübəli siyasətçi kimi qəbul etsəm də, etiraf etmək lazımdır ki, o son dövrlərdə siyasi proseslərdə nələrin yaşandığından xəbərsizdir. Üstəlik onun vahid namizəd kimi qəbul olunmasında problem var. Bu problem həmişə olub. Əgər ənənəvi müxalifət partiyaları Lalə Şövkətə güzəştə getsəydilər, bunu 2003-cü ildə edərdilər. Lalə xanımın indiki siyasi qeyri-fəallığını nəzərə alaraq hesab edirəm ki, onun müxalifətin vahid namizədi olması mümkün deyil”.
Ə.Abbasbəyli müxalifətin L.Şövkətə güzəştə getməməsinin onun qadın olması ilə bağlı olmadığını vurğulayıb: “Məncə, gender məsələnin burada heç bir rolu yoxdur. Kiminsə qadın olmasına görə hansısa siyasi xadimin öz iddiasından geri çəkiləcəyini də gözləmək doğru deyil. Bu, marşrut avtobusu deyil ki, kişilər ayağa qalxıb qadınlara yer versinlər. Lalə Şövkət özü də çıxışlarında dəfələrlə deyib ki, o ilk növbədə siyasətçidir. Təkcə Azərbaycanda deyil, dünyanın bütün ölkələrində namizədin qadın və ya kişi olmasına deyil, onların seçkiqabağı platformalarına, irəli sürdüyü şüarlara önəm verilir”.
Ə.Abbasbəyli payızda keçiriləcək seçkidə müxalifətdən hansısa qadın namizədin iştirak etməsinin gözlənilmədiyini də vurğulayıb: “Ola bilsin ki, Lalə Şövkət müstəqil şəkildə, yaxud Liberal Partiyanın namizədi kimi seçkidə iştirak etsin. Amma digər hansısa qadının namizədliyinin irəli sürüləcəyini gözləmirəm”.
Yorumlar 75