adu
http://www.adu.edu.az/xeber/az/111.htm
..: XƏBƏRLƏR :..
Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsi ADU-da monitorinq apardı 17.01.2011
Monitorinqdə qış imtahan sessiyasının gedişi yoxlanılıb
Yanvarın 17-də Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsi ADU-da qış imtahan sessiyasının gedişi ilə bağlı monitorinq apardı. Monitorinqdə ADU-nun rektoru, millət vəkili, professor Səməd Seyidov, Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsinin koordinatoru Əliməmməd Nuriyev, Şəbəkəyə daxil olan Korrrupsiyaya Qarşı Mübarizə Fondunun icraçı direktoru Vasif Mövsümov və İctimai Münasibətlər və Cəmiyyətin İnkişafı Mərkəzinin rəhbəri Əhməd Abbasbəyli iştirak edirdi. Tərcümə fakültəsində keçiilən Xarici dil və Ölkəşünaslıq imtahanlarının monitorinqi zamanı çıxış edən ADU-nun rektoru Səməd Seyidov universitetdə keçirilən imtahanlar barəsində qonaqlara məlumat verdi. Universitetdə keçirilən imtahanların obyektiv, düzgün və şəffaf keçirildiyini deyən rektor rəhbərlik etdiyi ali təhsil ocağının monitorinq aparılması üçün ictimai təşkilatlar üçün açıq olduğunu bildirdi. Imtahan nəticələrinin dərhal yoxlanılmasının müəyyən problemlər yaratdığını vurğulayan S. Seyidov bunun keyfiyyətin aşağı düşməsinə səbəb olduğunu diqqətə çatdırdı: “İmtahan nəticələrinin dərhal yoxlanılması keyfiyyət göstəricilərinin istənilən səviyyədə olmamasına gətirib çıxarır. Bu da öz növbəsində nəticələrlə bağlı appelyasiyaların çoxalmasına səbəb olur”. Rektor imtahan nəticələrinin qiymətləndirilməsi ilə bağlı dünya təcrübəsindən də bəhs etdi. O, müəllim və tələbə arasında lazımi ünsiyyətin qurulmasında qarşlıqlı anlaşmanın mühüm rol oynadığını vurğuladı: “Müəllim və tələbə ona verimiş hüquqları bilməlidir. Belə olan təqdirdə tərəflər arasında anlaşımazlıqlar yaranmaz”.
Fəaliyyət istiqamətləri haqqında tələbələrə məlumat verən Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsinin koordinatoru Əliməmməd Nuriyev ali təhsi ocaqlarında imtahan sessiyalarının gedişi ilə bağlı monitorinqlər aparıldığını bildirdi. İmtahan sualları ilə maraqlanan koordinator aparılan monitorinqlərin obyektivliyə xidmət etdiyini vurğuladı: “Şəbəkənin apardığı monitorinqlər edilən şikayətlərdə haqlı tərəfin müəyyən edilməsində mühüm rol oynayır. Şikayətlərlə bağlı şəbəkəyə müəyyən müraciətlər olur ”. Şəbəkə koordinatoru yaranan problemlərlə bağlı onlara müraciət etməyin zəruriliyini önə çəkdi. Şəbəkə üzvləri imtahan sənədlərinə də baxış keçirdilər. Tələbələr imtahanların yüksək səviyyədə keçdiyini və lazımi şərait yaradıldığını bildirdilər.
Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsinin koordinatoru Ə. Nuriyev monitorinqlərin aparılması üçün yaradılan şəraitə görə rektor S. Seyidova təşəkkürünü bildirdi.
Sonda ADU-nun Tədris şöbəsinin müdiri Lyudmila Muradovanın sədrlik etdiyi Operativ Qərargah üzvlərinin və Fransız, Alman, 1 və 2 saylı İngilis dili və Filologiya fakültə dekanlarının iştirakı ilə təklif və şikayətləri qəbul etmək üçün müvafiq qutular açıldı.
